Qazaqstan Elshisi Prezıdent Nursultan Nazarbaevtyń sálemin ıspandyq monarh pen onyń ákesi Korol I Hýan Karlosqa joldap, Elbasynyń týǵan kúni men Astananyń 20-jyldyǵyna oraı jyly quttyqtaýy úshin Memleket basshysy atynan Korol VI Felıpege taǵy da alǵys bildirdi.
О́z kezeginde, Korol óziniń Qazaqstanǵa sapary men «EKSPO-2017» halyqaralyq mamandandyrylǵan kórmeniń ashylý saltanatyna qatysýyn jyly lebizdermen eske alatynyn habarlady.
Kezdesý barysynda, oǵan Syrtqy ister, Eýropalyq Odaq jáne yntymaqtastyq mınıstri Jozep Borell de qatysty. Taraptar birqatar ekijaqty yntymaqtastyq pen halyqaralyq problemalardyń ózekti máselelerin talqylap, 2009 jyly qol qoıylǵan Strategııalyq áriptestik jónindegi kelisimniń negizinde qalyptasqan dostyq jáne serpindi damyp kele jatqan qazaqstan-ıspandyq qatynastardyń sıpatyn atap ótti.
Saýda-ekonomıkalyq baılanystardyń damýyna erekshe kóńil bólinip, aǵymdaǵy jylǵy 27 qyrkúıekte kezekti otyrystary Astanada ótetin Ekonomıka jáne ónerkásip salasyndaǵy úkimetaralyq komıssııa men Iskerlik keńes sııaqty qurylymdardyń mańyzdylyǵy basa aıtyldy.
Korol VI Felıpe bizdiń elimizdiń halyqaralyq dıplomatııa salasyndaǵy jemisti jumystaryn joǵary baǵalap, Qazaqstannyń BUU Qaýipsizdik Keńesindegi qyzmeti men dinaralyq dıalogty nyǵaıtý boıynsha kúsh-júgerin aıryqsha atap ótti. Osy rette, Monarh Qazaqstanǵa Álemdik jáne dástúrli dinder kóshbasshylarynyń VI sezin Astanada tabysty ótkizýine tilektestigin bildirdi.
